Bacolod City, Negros Occidental – Tubtob subong nagakabalaka sa gihapon ang pamilya sang isa ka seaman matapos nga ini ang nareport nga missing makaligad nga nasunog ang ginasakyan nga barko sang nakaligad nga Disyembre 31, 2018.
Si John Cyril Alabanzas ang isa sa 21 ka mga crew sang Panamanian vessel kag car carrier nga Sincerity Ace nga padulong sa Hawaii halin sa Japan sang nasunog sa kadagatan nga sakop na sang Hawaii.
Natigayon naman nga narescue ang 16 ka mga kaupdanan sang mga ini sa bulig sang nagresponde nga US Coast Guard (USCG) kag lima ka merchant vessels samtang lima ang padayon nga missing lakip si Alabanzas matapos ang mga ini ang naglumpat sa tubig.
Sa nagapadayon nga search and rescue operation, natigayon nga masalbar ang kaupod sini nga Ilonggo seaman nga ginkilala kay Verney Depositario.
Suno sa impormasyon, naghalin sa isa sa mga bodega sang amo nga barko ang kalayo samtang padayon pa ang maid-id nga imbestigasyon sang mga otoridad sa nasambitan nga insidente.
