Dipolog City – Human sa usa ka adlaw nga missing sa suba, napalgan nilutaw ang patay’ng lawas sa usa ka 52-anyos nga lalaki, kaganihang sayo sa buntag diha sa Purok Mahinabangon, Bolicon, Barangay Turno, dakbayan sa Dipolog.
Ang patay’ng lawas sa biktima nga si Jose Ruth Javier Bagalanon, alyas “Buntok” minyo, usa ka pintor mulupyo sa mao’ng dapit ang nakit-an kini sa usa ka manangiti nga nikaging ug burot na ang tiyan.
Matud sa mga igsuon sa biktima nga sila si Pacita Bagalanon ug Widmark Bagalanon, nga katapusan nila’ng nakit-an buhi ang ila’ng igsuon niadto’ng domingo sa hapon nga nakainom ug naghinoktok sa may control river.
Gisuwayan matud pa tambag sa igsuon nga si Widmark ang biktima apan kalit lang kining niambak sa Dipolog river ug wa na nila matabang, gumikan sa kakusog nga bul-og sa tubig.
Nagtuo ang magsuon nga ang paglarga sa asawa niini ngadto sa Manila, nga wa mananghid maoy hinongdan sa pagambak sa biktima.
Nagtinabangay pa ang mga silingan kagahapon sa pagsalum sa suba uban ang rescue team sa Brgy. Turno ug personahe sa CDRRMO dala sa pagbahasbahas sa kadaplinan apan pakyas nilang marekober.
Nianang alas 6:40 sa buntag, gikaingong usa ka manangiti sa may atbang nipahibawo nga nakit-an nang nilutaw ang patay lawas sa biktima ug usa ka bayong-bayong nga lalaki mao nay nisalum ug nipadaplin niini.
