Roxas City, Capiz – Disedido ang isa ka ginang nga pasakaan sini sang kaso ang 43-anyos nga mister matapos nga nadakpan nga yara mismo sa sulod sang ila panimalay sa banwa sang Ivisan kaupod ang kerida sini.
Nag-angkon sang pilas sa iya ulo ang amo nga mister sang ini ang ginlampusan sang iya misis gamit ang botelya matapos nga nadakpan sa akto nga nagapakighilawas sa sulod sang ila mismo kwarto.
Ginpahayag ni Police Staff Sergeant Cristina Polunan sang Women and Children Protection Desk(WCPD) sang Ivisan PNP nga nagpauli sa ila poluy-an ang misis kaupod ang anak agud nga kuhaon kuntani ang telebisyon kag iban pa nga mga gamit sang nakit-an ang motorsiklo sang kabit sang mister nga naka-park sa guha sang ila poluy-an.
Agud nga pamatud-an ang pagdudar, nagtamwa ini sa bintana kag didto gid naaktuhan ang mister kag kerida sini nga wala sang panapton.
Diri nagkuha sang botelya ang ginang agud nga bakbakon ang kerida apang sa baylo ang mister sini ang iya nga nalampusan sa ulo.
Suno kay Polunan, madugay na nga naga-away ang mag-asawa kag nagabulag-bulag ang mga ini.
Sa subong yara na sa paghinakop sang Ivisan PNP ang 43-anyos nga mister kag gina-alegar kabit sini.
