Boracay, Aklan – Padayon makaron nga gina obserbahan sa sangka hospital iya sa banwa it Kalibo ro sangka miyembro it demolition team sa Boracay matapos nga makuryente kahapon it agahon.
Ro biktima nakilaea kay Arnold Padayao, 40-anyos, residente it Sitio Tulubhan, Manocmanoc a presente nga nagatrabaho sa idaeom kung Provincial Engineering Office (PEO).
Natabo rong insidente samtang nagakakas it yero rong biktima gamit do bara kat gulpi rayang sumagi sa live wire rason nga imaw nakuryente.
Uwa eagi raya mapan-uhi ko anang mga mga kaibahan matapos nga may nabatian sandang nag eopok bangud sa andang pagpati raya hay linya eamang nga bag-ong takod.
Tag nakita eon rong biktima nga nagahamyangon hay insigida raya nga gindaea sa Ciriaco S. Tirol Memorial Hospital para mataw-an it nagakaigo nga medikasyon pero bangud ko grabe rong kondisyon it biktima hay imaw ra gin transfer iya sa banwa it Kalibo.
