Miyembro sa Ansar Al-Khilafa Philippines, dakpan sa buybust operation

168

General Santos City—Dakpan sa gipahigayong buybust operation sa hiniusang pwersa sa Philippine Drug Enforcement Agency (PDEA) Regional Office- 12 sa pagpanguna ni Director Gil Castro, Military Intelligence Group- Intelligence Service sa Armed Forces Of The Philippines ug Maasim Municipal Police Station ang usa ka lalaking gikaingong miyembro sa Ansar Al Khilafa Philippines (AKP).

Giila ni PDEA Assisstant Secretary Jesus Fajardo ang suspek nga si Morsalen Mashod Y Conception, 45 anyos, tindero ug isda, residente sa Crossing Nomoh, Barangay Kanalo, Maasim, Sarangani Province.
Nakuha gikan sa iyahang posisyon ang usa ka sachet sa gituuhang shabu kantidad 500 ka pesos ingon man ang laing (6) ka sachet sa gikatahapang Shabu nga gibana-banaang mukabat sa 1.5 gramos nga nagkantidad ug P11, 225.00

Basi sa inisyal nga imbestigasyon, lambigit si Mashod sa AKP nga gidumalahan kaniadto sa namatay nga si Muhammad Jaafar Maguid, Alias Tokboy Maguid ug kini maoy sinaligan nga close in security ni Maguid ug iya usab kining bayaw.


Dugang pamahayag ni Asec. Fajardo, adunay standing warrant of arrest sa kasong lugos ang suspek nga si Mashod nga na-issue niadtong Enero, 2010.

Saysay pa ni Asec Fajardo, makonsiderang dakong kalampusan alang sa PDEA 12 ang pagkasikop sa suspek gumikan sa koneksyon niini sa steroristang grupo.

Sa kasamtangan, ilaha na matud pang ginahikay ang mga dokumento niini aron nga ma-turn over na ngadto sa Police Regional Office 12 ang nahisgutan. Samtang gipahugtan na usab ang seguridad sa buhatan sa PDEA-12 gumikan sa posibilidad nga kini i-rescue sa iyahang mga kaubanan sa grupo.



Dako man usab ang pagtuo ni Asec Fajardo nga si Mashod maoy mupuli kang Maguid sa pagdumala sa Ansar Al-Khilafa Philippines hilabi na nga basi sa ilahang impormasyon gikan kini sa ubang nasud ug mibalik sa rehiyon 12, luyo pa man sa iyahang standing warrant of arrest.

Photo Credit To: PDEA Gensan


Facebook Comments