Davao City – Padayong ginatuki karon ang pagsulbad sa problema sa mga migranteng pinoy sama nalang sa wala masweldohi nga mga OFWs.
Kini ang gibutyag ni Mindanao Migrants Center for Empowering Actions, Inc. kun MMCEAI Executive Director Inorisa Elento atol sa gilusad nga Davao Regional Stakeholders’ Conversations on Migration, Environment, Peace and Development (MPED).
Sumala ni Elento, sa nagkataas nga ihap sa mga naga abroad diin anaa sa 7,200 pinoy ang nagagawas kada adlaw gikan sa Pilipinas aron manarbaho base sa ilang nakuha nga datos, taas usab ang problemang padayong nasinati sa mga OFWs sama nalang sa non-payment of wages gumikan mitakas sa amo o tungod sa mga isyu nga ilang gikalambigtan apan wala pay eksaktong ihap og pila kini tungod padayon pa nilang ginatuki ang datos bahin sa OFWs.
Dugang niini, wala gihapon nawala sa datos ang problema sa illegal recruitment ug trafficking sa komunidad busa gilusad nila karon ang pagpakighinabi uban ang pribadong sektor sama sa academe ug media aron matuki ang konkretong sitwasyon ingon man makahatag og rekomendasyon ngadto sa gobyerno og unsay angay buhaton aron matubag o matabangan kadtong mga migrante ingon man mga nabiling pamilya sa mga migrante.
Alang usab sa mga buot magpatabang o dunay concerns bahin sa migration, mamahimong muduol sa Mindanao Migrants Center for Empowering Actions, Inc. nga nahimutang sa Davao Executive Homes sa Matina o diba kaha mutawag sa ilang contact number nga 299-0374.
RadyoMaN Renz Barbarona
