Gibutyag ni MMCEAI Executive Director Inorisa Elanto nga nalisuran sila karon sa pagkumpirma kon dunay mga Overseas Filipino Workers nga napagan sa paghampak sa makusog nga linog sa Turkey nga mikutlo na og kapin libo ka kinabuhi ug mga naangol.
Segun ni Elanto nga usa sa problema nga na-enkwentro karon sa ilang buhatan mao nga walay perpekto nga tracking system nga namuntar ang gobyerno ug layo sab ang embahada sa Pilipinas gikan sa sentro sa linog.
Gipasabot niini nga mamonitor lang nila ug sa gobyerno ang mga OFW atol sa ilang pagsulod sa Turkey apan ugali makasugod na og trabaho sulod sa duha ka bulan lisod na kini mamonitor hilabi na kadtong dili dokumentadong mga Pinoy.
Nasuta nga taas ang kaso sa mga Pilipino nga ilegal nga misulod sa maong nasod.
Giingon sa labaw sa Migrante nga kon naa lang unta’y kaugalingon nga total enumeration system o profiling ang lokal nga gobyerno sayon ra kaayo subayon ang mga Pinoy sa Turkey karon.
Apan gipasalig ni Elanto nga walay hunong ang ilang pagpanubay sa lugar pinaagi sa ilang mga partners nga nakabasi sa maong nasod karon.
RadyoMaN Joel Viray
