Giila ang biktima nga usa ka Bicolana nga si Jullebee Ranara samtang ang suspek mao ang 17 anyos nga anak sa amo niini sa Kuwait diin nahibal-an nga buntis usab ang biktima.
Sa pakighinabi sa DXDC RMN Davao kang Inorisa Elento, MMCEAI Executive Director, bisan pa man dunay deployment ban nga gipatuman, daghan gihapon ang mga kasong pagmaltrato sa OFWs sa laing nasud busa nanawagan ang maong opisyal ngadto sa Department of Migrant Workers nga aksyonan ang susamang mga kaso.
Samtang, gisulti usab niini nga dili solusyon ang permanent deployment ban aron masulbad ang mga kasong pagpangabuso sa OFW busa usa kini ka dakong hagit karon sa unang nasangpit nga departamento nga maghimo pa og mga lakang aron matabangan ug maprotektahan ang mga Pinoy nga manarbaho abroad.
“Ang akong punto de vista niini, ang permanent deployment ban pwede gamiton nga usa ka pamaagi diin marehistro ang protesta sa ing-ani nga pagpangabuso but then a permanent deployment ban is not also sakto nga lakang. Kasi ang tan-aw nato sa deployment ban sa usa ka nasud labi na sa ani nga abuso, mas mutaas og samot ang trafficking in person and illegal recruitment,” saysay ni Elento.
Subay sa maong insidente, mapasalamaton si Elento sa daling aksyon sa Kuwaiti government diin gilayong nadakpan ang suspek nga 17 anyos ug nanghinaut nga mahatagan og hinanaling hustisya ang kamatayon sa nanimpalad nga OFW aron dunay makasuporta sa iyang pamilya dinhi sa nasud Pilipinas.
RadyoMaN Renz Barbarona, RadyoMaN Kirby Manzon
