Pormal ng binuksan ng Eastern Police District (EPD) ang mobile library na may layuning mapalapit ang mga pulis sa komunidad sa pamamagitan ng mga community based program.
Pinangunahan ni EPD Director Police Brigadier General Nolasco Bathan ang nasabing programa na isinagawa sa Barangay Pineda, Pasig City.
Ayon kay Bathan, malaking tulong ang pagbibigay ng tamang kaalaman at edukasyon sa mga bata para malaman kung ano ang tama at mali.
Aniya, sa pamamagitan ng kanilang inilunsad na programa ay mahuhubog ang kaalaman ng mga kabataan para maging isang mabuti at responsableng mamamayan.
Naniniwala naman si Bathan na ang mga magulang pa rin ang may malaking responsibilidad para turuan ng tamang asal at pag-uugali ang kanilang mga anak.
Bukod pa rito ay nagkaroon din ng feeding program ang EPD kung saan dinaluhan ito ng mahigit 300 mga bata.
