Davao City – Gidayeg usa ka konsehal sa unang distrito ning siyudad sa Dabaw ang pamaagi sa usa ka tulonghaan sa Imus Cavite sa pagmuntar og modern nga entrance kansang awtomatiko mag-text sa mga ginikanan nga nag-cutting classes ang ilang mga anak.
Gibutyag ni Councilor Joanne Bonguyan-Quilos nga epektibong pamaagi ang paggamit og teknolohiya sa entrance sa eskwelahan sa Imus Cavite diha sa pagbatok sa mga estudyante nga walay kalisang sa pagsibat sa klase.
Suma ni Councilor Quilos kinsa Chairman sa Committee on Information Technology sa konseho nga mahinungdanon masayod ang mga ginikanan nga misibat sa klase ug nagpabadlong sa tulonghaan ang ilang mga anak aron mapitol dayon ang dili nila maayong binuhatan sa eskwelahan.
Apan dili sold-out sa idea ang konsehala nga dapat adaptahon sa siyudad sa Dabaw ang palisiya sa Imus Cavite tungod sa kadaghang panginahanglanon sa matag tulonghaan nga angay unahon una sa gobyerno ug sa Department of Education.
Aminado si Councilor Quilos nga importante kaayo ang susamang matang sa teknolohiya sa Imus Cavite kay kaayohan man kana sa mga estudyante apan tubagon una ang problema sa mga tulonghaan.
Ug kung mabuhat na kini dinha na pwede adaptahon sa siyudad ang pamaagi sa Imus Cavite nga gi-instalaran og moderno nga teknolohiya ang entrance point sa tulonghaan kansang dunay kapasidad sa pagtext ug magpahibawo sa mga ginikanan nga wala mosulod sa klase ang ilang mga anak.
RadyoMaN Joel Viray
