Tradisyon na sa mga Pilipino ang pagduaw sa mga lubnganan sa mga minahal sa kinabuhi nga mipanaw na sa laing kalibutan isip paghandum kanila matag Undas. Kasagaran kanato magdala og buwak, magdagkot og kandila, maghalad og pagkaon o di ba kaha mag-ampo o magpa-misa.
Layo man o duol ra sa mga sementeryo, mangita gayud ang uban og pamaagi nga maka-duaw sa mga lubnganan kaysa daw sila ang duawon sa mga minatay. Aduna usab pipila kanato ang mopahimulos niini nga higayon aron magkatipok ang pamilya nga nagkabulagbulag tungod sa trabaho, eskwela ug uban pa. Bahala’g magkalisud o maskin di matunong sa mismo nga Adlaw sa mga Kalag, basta makaduaw lang.
Tungod niini, daghan ang nahibuhong kung nganong Oktubre 31 ug Nobyembre 1 lang ang gideklara nga Holiday nga sa Nobyembre 2 pa man unta ang adlaw sa mga kalag.
Sa gipahigayon nga Poll sa Supsup Lalat Tandem sa Programa nga “i Sa Umaga” kaganihang buntag, pipila ang miuyon nga ilakip unta nga ideklara nga Holiday ang Nobyembre 2 sa pagsaulog sa Undas. Apan subo pamalandungan nga pipila usab ang gakalibog kung unsa nga petsa gayud ang pagsaulog sa “All Saints Day” ug sa “All Souls Day”.
Nobyembre 1 mao ang Adlaw sa mga Santos ug Nobyembre 2 usab ang Adlaw sa mga Kalag. Kung ikaw ang pangutan-on, asa man sa duha ang mas gusto nimo isaulog o handumon? Ang mga Santos ba nga di nimo ig-unsa ni wa nimo mailhan o ang mga Kalag sa mga mipanaw na nimo nga mga sakop sa pamilya, paryente ug higala?
Para sa imong tubag sa pangutana, reaksyon ug uban pa, mamahimo nimong i-comment sa ubos.
