Davao City – Naglusad karon og national survey ang National Youth Commission (NYC) aron sutaon ang matuod nga sitwasyon sa mga kabataan diha sa ilang pagtoon sa learning modules kabahin sa blended learning modality.
Sumala ni NYC-XI Regional Cluster Head Mayjee Dela Cruz, ilang gipangutana ang mga kabataan kon unsay ilang masulti sa modules nga gi-provide kanila sa Department of Education (DepEd) subay sa new learning platform bunga sa nagpadayong hulga dala sa COVID-19 pandemic.
Nasayran nga gihimo ang nasangpit nga survey aron sayron ang sentimyento ug mulo sa mga kabataan mahitungod sa blended learning system sa edukasyon ug aron usab makorehian kadtong mga problem areas nga nanginahanglan og improvements.
Segun ni Dela Cruz, nabahin ang opinyon sa 250 ka mga student respondents diin adunay mitubag nga dili nila kaya ang modules apan aduna usay nagsulti nga makaya-kaya ra.
Sa pasiunang assessment, ninggula nga ang materyales nga gihatag sa education department nagbaton og ubay-ubay’ng sayop nga mga entries or contents, usab ang mga pangutana dili kaayo klaro ug lisod sabton nga mas nagpalabad pa hinoon sa ulo sa mga estudyante.
Dugang ni Dela Cruz, ila usab nga gisuta ang mental health and wellness sa mga learners karon nga via modules na ang ilang systema sa pagtoon ilawom sa blended learning platform ning panahon sa pandemic.
Apan nasuta nga daghan sa mga estudyante ang nakasinati karon og ‘psychological burnout’ tungod kay dili nila kaya ang gidaghanon sa mga module loads nga angay tun-an ug tubagon matag semana.
Subay sa datos, gikan sa June hangtod ning bulan sa October, upat na ka mga estudyante ang naghikog nga gituhuang resulta lamang sa blended learning gani nalisdan sa bag-ong sistema sa pagtoon.
Unang nagkutlo sa kinabuhi mao ang usa ka 19 anyos nga college student niadtong June 16 tungod dili kaya paliton sa mga ginikanan ang laptop nga iyang gikinahanglan alang sa ilang online class.
Sa Albay, usa ka Grade 9 student ang nagpakamatay human na-stress sa galastohanan sa iyang online learning samtang didto sa Tupi, South Cotabato lain pang batan-on nag-suicide sa gituhuang rason nga module-related dilemma.
Lain pang naghunos sa kinabuhi mao ang usa ka 21 anyos nga lalake nga college student sa usa ka unibersidad sa Bohol diin ang hinungdan gituhuang kalisud dala sa modular learning mode gihapon.
Denhe sa Davao Region usab, laing 14 ug 15 anyos nga tinun-an sa Davao de Oro ug Davao Occidental nagtubok gamit ang nylon rope tungod gihapon sa blended learning-related psychosocial issues.
Sugyot ni Dela Cruz nga angay mupahigayon na gilayon og evaluation ang DepEd ilabi na kalambigit sa impact sa new learning scheme ug sa coping mechanism sa kabatan-onan sa dihang pogoso kitang gipasagop sa ‘New Normal in Education’ sugod niadtong October 5, ning tuiga.
RadyoMaN Joel Viray
