Bacolod City – Buwas magabukas na ang ika-24 nga Panaad sa Negros Festival apang may duha ka mga lugar sa Negros Occidental ang indi magpakigbahin.
Suno kay Panaad sa Negros Festival Director Marlin Sanogal, ang La Carlota City natiempuhan nga highlights man sang ila nga Pasalamat Festival rasun nga indi sila makapasakop sa mga activities. Apang suno kay Sanogal, bukas naman kag regular ang hilikuton sa La Carlota City Panaad Booth.
Sa bahin naman sang Moises Padilla, wala gid nagpirma sang mga Memorandum of Agreement ang banwa paagi naman ka Mayor Magdaleno ‘Magsie’ Peña sa wala mahiluan nga rason.
Para ka Sanogal, wala man sang problema nga wala ang Moises Padilla apang disbentaha ini sa banwa kag mga pomoloyo, bangod ang Panaad tion para mashowcase kon tani sang banwa ang iya mga produkto kag kultura.
Sa record sang probinsya ang Moises Padilla amu ang pinakapigado nga banwa sa Negros Occidental sa diin 56.6% sa ila populasyon ang pigado ukon below poverty line.
Si Peña ang na-tag nga hayag nga kritiko ni Governor Alfredo Marañon, sa diin amu man ang ginasiling sa likod sang mga kaso nga ginpasaka kontra kay Marañon halin sa Negros First Ranch kag sa pagbakal sang karnero abroad.
Buwas sa hapon Sabado, Abril 22 opisyal nga magabukas ang 24th Panaad sa Negros Festival sa diin mangin highlights naman ang Best of Festival Dances sa tagsa ka mga syudad kag banwa.
Sa gab-i man patigayunon ang RMN-Panaad Hiphop Challenge 2017 upod ang live drama paagi sa mga artista sa radyo nga sanday Kalot kag Tolilot.
La Carlota, poverty line,
