Un mojer barangay kagawad de Mampang en este ciudad y su hijo hunto con un alegao drug addict ya sale arestao durante el buy-bust operation ya conduci el maga pulis del Tetuan Police Station del MIercoles por la noche.
El pulis ya nombra con el maga arestao como canda; Kagawad Pilar Dagalea y Binarao, 64, vuida, su hijo si Dexter Dagalea y Binarao alias Batita, 36 y el untal Joebert Eijansantos y Hortilano, 31, de Tugbungan.
El report del pulis ta aparese banda alas 9 del noche cuando mismo el hefe del Tetuan Police Station Supt. Nonito Asdai ya encabesa con el buy-bust intendido para con Dexter na diila mismo residencia.
Despues ya man cambiajan el P200 marked money y el un paquete de shabu entre si Dexter y el pulis quien ya pretende comprador, dayun el otro maga pulis hunto con Asdai ya encercula el lugar donde ya encuntra estos otro 8 paquete de shabu y otro maga palastroque de droga na mismo residencia del maga Dagalea.
Na mismo tiempo, ya tene que agara el maga pulis con Kagawad Pilar despues ta cre el pulis tiene le que hace na bendida de shabu del su hijo.
Con Eijansantos ya agara tambien porcausa asegun tiene tambien este saber con el trabajo di Dexter.
Canila tres ya lleva na estacion del pulis del Tetuan mientras el maga shabu ya entrega dayun na PNP Crime Laboratory.
