Pagadian City – Mosubra sa 17,000 na ka indibidwal ang gideklarang naulian na sa (COVID-19) sa tibuok Zamboanga Peninsula.
Kini base sa datos nga gipagawas sa Department of Health Regional Office-9 (DOH-9) kagahapon.
Sumala ni Dr. Jemuel Cristobal, DOH-9 medical officer, ang rehiyon 9 nakatala og 17,761 recoveries gikan sa 22,667 ka kumpirmadong mga kaso.
Base sa datos, ang rehiyon adunay 4,062 active cases ug mosubra sa 800 na ang namatay.
Gidugang ni Dr. Cristobal, ang Zamboanga City maoy nagbaton sa pinakamataas nga recoveries nga miabot sa 10,517 gumikan kay ang maong syudad ang bugtong lugar sa kasagpang Mindanao nga nakabaton sa pinakadaghang confirmed cases nga miabot sa 11,550.
Gisundan kini sa Zamboanga del Sur nga dunay 3,456 recoveries; Zamboanga del Norte, 2,368; Zamboanga Sibugay, 964; ug Isabela City, Basilan, 668.
Sa ihap kumpirmadong kaso, ang Zamboanga del Sur ang misunod sa Zamboanga City nga nakatala og 4,739; Zamboanga del Norte, 4,079; Zamboanga Sibugay, 1,686; ug Isabela City, 762.
Base usab sa datos niining panahona ang Zamboanga del Norte ang nanguna sa pinakadaghang natala nga aktibong kaso nga miabot sa 1,587.
Gisundan kini sa Zamboanga del Sur, 1,152; Zamboanga Sibugay, 672; Zamboanga City, 525; ug Isabela City, 75.
Sa ihap sa mga nangamatay sa Covid-19, nag-una ang Zamboanga City, nga mitala og 518; Zamboanga del Sur, 135; Zamboanga del Norte, 123; Zamboanga Sibugay, 48; ug 19 sa Isabela City, Basilan.
