Guipos, Zamboanga del Sur – Blangko pa ang kapulisan sa lungsod sa Guipos sa pagtumbok sa motibo sa pagpusil patay sa 58-anyos nga magtutudlo didto sa Balongating National High School nga sakop sa Barangay Balongating, Guipos ning probinsya sa Zamboanga del Sur.
Mahinumduman nga dead on the spot ang biktima nga Narcisa Gumibao Caay, 58-anyos, magtutudlo sa maong pampubliko nga tulunghaan nga maoy grade 6 class adviser ug lumulupyo sa nahisgutan nga Barangay.
Sa inisyal nga imbestigasyon, nasayran nga samtang anaa sa sulod sa iyang lawak klasehanan ang biktima kalit nga nibutho ang duha ka mga suspek nga nga pulos nagsul-ob og jacket, naka-half mask helmet ug dunay sunglasses dihang nakit-an ang target nga magtutudlo gipusil kini gamit ang Calibre 45 nga pistola nga miresulta sa hinanali nga kamatayon sa biktima.
Human sa pagpamusil daling nisibat ang mga suspek sakay sa Skygo, color blue nga motorsiklo paingon sa National highway, Balongating, Guipos, Zamboanga del Sur.
Gumikan sa hitabo gisuspenso ang klase kagahapong adlawa sa maong tulunghaan.
Daling naglusad og hot pursuit operation ang tropa sa Guipos PNP alang sa daling pagdakop mga suspek.
