Davao City – Duha ka mga anggulo ang ginatutukan karon sa Tagum PNP atol sa ilang nagapadayong imbestigasyon kalabutan sa pagpusil-patay sa 41 anyos nga abogado naila nga si Atty. Rex Jasper Lopoz alas-7:21 Miyerkules sa gabii.
Sa eksklusibong interbyu sa RMN Davao kang Tagum PNP spokesperson P/Sr. Insp. Anjanette Tirador, unang anggulo ang personal nga bangi ug ikaduha ang pagpaninalos subay sa trabaho niini.
Gisaysay ni Tirador nga adunay kasamtangang kaso ang ginagunitan karon si Lopoz bahin sa iligal nga droga.
“Mostly man gud sa ginagunitan nga kaso ni attorney is about illegal drugs pero naa pay mga possible angle nga gina follow karon para ma establish kay naa pa fa sa process sa elimination,” segun niini.
Sa inisyal nga imbestigasyon sa kapulisan, migula nga pasakay na sa iyang sakyanan ang biktima nga nakaparada gawas sa City Mall of Tagum diin kalit na lamang kini natumba.
Daling gidala sa Bishop Joseph Reagon Hospital ang biktima ug didto nasuta nga adunay usa ka samad pinusilan sa likod nga bahin rason usab sa iyang kamatayon.
Nasayran usab nga nakadungog og usa ka buto ang security guard sa maong mall ug nagtoo nga gikan lang kini sa tambotso sa nakaparada nga sakyanan.
Gani sa pagkakaron padayon pang ginaila ang maong mamumuno ingon man ang tino nga motibo sa maong krimen.
Subay niini, gikanayon sa tigpamaba sa Tagum PNP nga wala silay nadawat nga report labot sa pagpatabang sa mga abogado nga adunay bahad sa kinabuhi rason nga gikunsidera nila kining usa ka isolated case.
RadyoMaN Jason Amisola
