Motibo sa pagpusil sa lalaki sa Nabunturan, giimbestigahan

Davao City – Gipalawman pa sa Nabunturan Municipal Police Station (MPS) ang imbestigasyon sa pagpusil-patay sa usa ka lalaki nga nagtrabaho sa vulcanizing shop sa Purok 2, Barangay Poblacion, Nabunturan, Davao de Oro alas 7:05 sa gabii niadtong Martes, Abril 25, 2023.

Sa interbyu sa DXDC RMN Davao kang Police Lieutenant Colonel Jess Maghirang, Acting Chief of Police sa Nabunturan MPS, padayon ilang koordinasyon karon sa pamilya ug higala sa biktima nga si Dominic Gaviola, 32 anyos, tireman sa ilaha mismong vulcanizing shop nga nahimutang sa nahisgutang lugar.

Sa imbestigasyon, samtang nagtrabaho ang biktima, kalit na lamang kining giduol sa wala mailang suspek ug gipusil ang biktima gamit ang gituohang 45 pistol, dayon miikyas sa wala matinong direksyon.

Matud sa pulis nga sa ilang pakighinabi sa ginikanan sa biktima, wala silay nahibaloan nga adunay kaaway o nakaaway ang biktima nga posibleng maoy naghimo sa krimen.

“Medyo na-puzzle pud ‘mi kung wala may record o background (ang biktima). Nangita pa mi’g other sources nga makahatag og (impormasyon aron) makatabang sa pag-establish sa motive,” saysay sa police official.

RadyoMaN Kirby Manzon