Davao City – Padayon karong giimbestigahan sa Padada Municipal Police Station (MPS) ang pagpusil sa usa ka babayi sa Purok Danggit, Barangay San Isidro, Padada, Davao del Sur, alas 8:45 sa gabii niadtong Martes, Nobyembre 29, 2022.
Sa interbyu sa DXDC RMN Davao kang Police Master Sergeant (PMSgt.) Henry Villamor, personahe sa Padada MPS, giila niini ang biktima nga si Monica “Bembem” Nerosa, 47 anyos, minyo ug residente sa nahisgutang lugar.
Sa imbestigasyon, kalit matud pang misulod ang suspek sa tugkaran sa balay sa biktima ug didto na kini namusil sa makadaghang higayon gamit ang .45 caliber pistol.
“Gina-follow up pa karon sa IOC (Investigator-on-Case) ang kaso. Ang kadtong basiyo nga narekober iyahang gihatud sa crime laboratory,” sulti sa pulis.
Sa pagkakaron, padayong nagpaalim sa Davao del Sur Provincial Hospital, ang biktima nga nasayrang usa ka unit leader ug aktibong supporter sa dagkong politiko sa ilang lugar.
RadyoMaN Kirby Manzon
Facebook Comments
