Davao City – Gihulat gihapon sa 19th City Council ang desisyon sa mga request nga ibalik ang motor backriding dili lang sa mga magtiayon dinhi sa dakbayan sa Davao, pinaagi sa giduso nga resolusyon sa konseho.
Gibutyag ni Councilor Conrado Baluran, Committee on Transportation and Communications chair atol sa interview sa DXDC RMN Davao, daghan ang nanginahanglan og masakyang motor silbing transportasyon ilabina isip panginabuhian sa Marilog, Paquibato ug uban pang hilit nga mga lugar.
“Kami gyud sa City council magahulat mi sa final kay naga-request naman ta, sa una nagpasa naman ta’g resolution nga ibalik na siya (backriding). Ang ato ani kung unsa tong gisulti ni Mayor, atong pagasundon kay sa pagkakaron gusto nato maprotektahan ang drivers ug pasahero mao na ang tuyo sa City Council nga ibalanse ang income sa katawhan sa drivers ug health sa sumasakay,” segun ni Baluran.
Gibutyag ni Baluran, ginalantaw nila ang pagbalanse sa hisgutanang panlawas kontra COVID-19 ug ekonomikanhong aspeto usab sa katawhan.
RadyoMaN Aimee Guinita
