Davao City – Daghan ang mipadangat sa ilang panawagan nga wagtangon usab ang motorcycle barrier human nga temporaryong gisuspende ang paggamit sa Food and Medicine (FM) pass epektibo kagahapong adlawa (March 15, 2021).
Usa lamang si Vanessa Carmelotes sa mga netizens nga mihangyo nga apilon nalang ang pagwagtang sa motor barrier tungod kay nagadala ra kini’g hasol sa sakyanan.
“Walaon napud unta ang barrier kay useless man! Samok-samok ra. Hasle kaayo ang barrier oy. Hassle kaayo nang barrier. Tarongan daw ninyo og hunahuna bago ninyo ipatupad. Oplok man nang barrier, wala man nay tabang. Igang-igang ra na sa likod sa nag sul-ob,” kumento niini.
Apan giklaro ni Davao City Mayor Sara Duterte-Carpio nga sa pinakaulahing pakigpulong niini sa hingtungdang ahensya sa gobyerno, magpabilin ang pagpatuman sa motorcycle barrier isip pamaagi sa pagkontrola sa pagkatag sa Coronavirus Disease 2019 (COVID-19).
“Wala gi-lift sa atoang PNP ang motorcycle barrier, sa DILG ang requirement nga motorcycle barrier. Ang motorcyle barrier po, para po na siya nga dili maglagpot ang laway,” tataw sa Mayor.
Gidugang sa Alkalde nga importante ang pagbaton sa maong barrier bisan sa unsang klase sa quarantine status, mapa Enhance Community Quarantine (ECQ), General Community Quarantine (GCQ) nga maoy status karon sa syudad ug bisan sa panahon nga ipailawom ang dakbayan sa Modified GCQ.
RadyoMaN Kirby Manzon
