Davao City – Gikalipay karon sa usaka kanhi opisyal sa Inter-Agency Council for Traffic (I-ACT) ang pagbakwi sa National Task Force on the Management of Emerging Infectious Diseases (IATF) sa implimentasyon sa controversial motor barrier policy.
Matud ni former I-ACT Deputy Executive Director Elmer Argano, nagpakita lamang kini nga dili insensitive ang atong mga kadagkuan sa mulo ug yangungo sa kadaghanan nga ang motor barrier dili epektibong pang-alkontra sa COVID-19.
Segun kang Argano, dugang palas-onon lamang kini sa abaga sa mga managtiayon gumikan dugang gasto ang pagpalit og plastic barriers nga mas gipasamot pa sa realidad nga daghan sa gihapon karon walay igong kapasidad sa panalapi sanglit ubay-ubay wala pa gayud hingpit mahibalik sa normal nga panginabuhian mugna sa mga lockdowns ug multi-layered quarantine control measures.
Daw mahulog na lamang sa walay hinungdan ang pagpa-imposar sa gobyerno sa motor barrier regulation sanglit pag-abot sa balay magdulog lamang gihapon sa pagtulog ang mag-asawahay, obserbasyon ni Argano.
Awhag sa kanhi opisyal sa I-ACT ngadto sa publiko nga paningkamotang sundon ang pahimangno sa pagtamod sa tanang mga health protocols sama sa pagsuot og face mask, physical o social physical distancing ug uban pang taktika aron ma-preserbar ang atong kinabuhi taliwala niining pandemic.
RadyoMaN Joel Viray
