Davao city – Maayong pagkabunal sa ulo sa usa ka driver sa motor nga walay suot nga helmet human nabangga sa truck hinungdan sa pagkamatay niini.
Nahitabo ang maong aksidente alas 3:50 kagahapon sa hapon.
Gisulayan pa og luwas sa Emergency Medical Team ang biktima nga si Ronald Sumayang, 21 anyos, laborer, ulitawo, ug nagpuyo sa Barangay Wa-an, Davao City.
Sa imbestigasyon sa traffic section sa Buhangin PNP, paspas matud pa ang dagan sa motor gikan sa North bound area ug pag-abot sa lubakon nga bahin wala makontrolar sa biktima ang motor hangtud mitipas sa laing lane sa dalan apan midiretso kini og sung-ag sa bumper sa truck nga mihunong niadtong tungura.
Gumikan sa kakusog sa impact, maayo pagkatumba ni Sumayang ug gituhoan nga nabunal ang ulo ani sa semento dihang nibangga kini sa truck.
Ingon sa driver sa truck nga si Ricardo Silana, 49 anyos, ug minyo nga napugos siya og hunong tungod sa sitwasyon sa dalan apan kalit lang misungag ang motor diin nagtoo si Silana nga naka-inom ang namatay.
Hinuon gitabangan na sa kumpanya kung asa nagtrabaho si Silana ang kabanay sa biktima ug suwayan og negosar sa driver ang pamilya sa namatay aron dili na ipadayon ang pagsang-at og kasong Reckless Imprudence Resulting to Homicide.
RadyoMaN Joel Viray
