Cabagan, Isabela – Pinaghahanap parin hanggang sa ngayon ang lalaking sakay ng motorsiklo at nahulog kagabi sa Cabagan-Sta. Maria over flow bridge sa Brgy. Casibarag Norte, Cabagan, Isabela.
Sa pakikipag-ugnayan ng RMN Cauayan kay Police Chief Inspector Noel Magbitang, hepe ng PNP Cabagan na ang biktima ay kinilalang si Samuel Mirasol Baricaua, tatlumpu’t anim na taong gulang, may asawa, trabahador at residente ng Brgy. Mozzozzin, Sta. Maria, Isabela.
Aniya pauwi umano ang biktima na sakay ng kanyang motorsiklo at nang makarating sa nasabing tulay ay bigla na lamang umano natumba ang kanyang motor na sanhi naman ng kanyang pagkahulog sa ilog.
Sinabi pa ni Police Chief Inspector Magbitang na maaring lasing umano si Baricaua kaya’t tuluyang nahulog sa ilog at maaring mabilis na tinangay ng malakas na agos ng tubig.
Patuloy parin umano ang isinasagawang rescue operation ng mga kasapi ng PNP Cabagan at mga opisyal ng barangay sa nasabing lugar.
