Patay ang isang 27-anyos na lalaki matapos bumangga ang kanyang minamanehong motorsiklo sa isang truck sa National Highway ng Brgy. Longos, San Fabian, Pangasinan, Sabado ng gabi.
Ayon sa ulat ng pulisya, parehong binabaybay ng mga sasakyan ang direksyon patungong hilaga nang maganap ang aksidente. Habang nagkakabig pakaliwa ang truck na minamaneho ng isang 35-anyos na truck driver mula Bugallon, Pangasinan, biglang sumalpok mula sa likuran ang Yamaha motorcycle na walang plaka, na minamaneho ng biktima na residente ng San Fabian.
Agad isinugod ang biktima sa pinakamalapit na pagamutan ngunit idineklarang dead on arrival (DOA) ng kanyang doktor.
Patuloy na iniimbestigahan ng mga awtoridad ang insidente upang alamin ang iba pang mga detalye at posibleng pananagutan. |𝙞𝙛𝙢𝙣𝙚𝙬𝙨
