Davao City – Susihon sa Davao City Police Office (DCPO) Traffic Group ang mga CCTV footages nga ilang nakuha nga maoy makatabang aron maila nila ang mga sakay sa raider nga motorsiklo nga niipsot atol sa gipahigayong checkpoint niadtong Biyernes alas 11:30 sa gabie.
Sa interbyu sa RMN Davao kang DCPO Traffic Group chief PSupt. Nolan Raquid nga uban ang intelligence unit sa Sta. Ana PNP padayon silang gapangalap og impormasyon sa maong mga salawayong motorista.
“Pareho ni sila walay helmet ang backride niya babae imbes nga muhunong nisutoy hinuon so napugos ang atong tropa sa Traffic group nga gukdon sila kay dili ta kahibalo kung unsay bitbit nila basin naay drugs, pusil or bomba,” matud ni Raquid.
Gibutyag ni Raquid nga atol sa pagginukdanay nabundulan og kotse sa may Veloso cor. Sobrecarey St., Obrero ang usa sa iyang mga personahe nga si PO1 Lendy Lapeceros kinsa gioperahan karon sa Southern Philippines Medical Center human nabalian sa iyahang wala nga tiil.
Matud ni Raquid pasakaan nila’g kasong disobedience ang nasangpit nga motorista.
Gipasabot sa labaw sa Traffic Group nga igo lamang nilang giimplementa sa DCPO ang mando ni Davao City Mayor Inday Sara Duterte-Carpio diha sa kampanya kontra unsafe driving o riding.
“Dili unta sila mag-ingon ana nga sibatan mi kay kami nagpahigayon mi niining operasyon para man sa ilahang proteksyon. Ang katong pagsibat nila is very dangerous gyod kay they are not only pushing great danger to themselves but also katong pwedi nilang mabanggaan samtang gasibat sa amoa,” gibatbat ni Raquid.
Samtang sukad nga gilusad ang maong kampanya dinhi sa syudad mokabat sa 15 ka mga hubog nga nagmaneho o Driving under Intoxication ubos sa RA 10586 ang nadakpan sa Traffic Group, 324 ang sikop nga wala nag-helmet (RA 10054 Helmet Law) ug 881 ang nadakpan nga nakalapas sa RA 4136 kun Traffic Laws.
RadyoMaN Aimee Guinita
