Roxas City, Capiz – Patay ang duha ka mga persona samtang sakay sa motorsiklo matapos mabungguan sang pribado nga salakyan(Toyota Revo) sa Barangay Manibad, Mambusao, Capiz mga alas 2:40 ang takna kahapon sang hapon. Ginkilala ang mga biktima nga sanday Ronald Valdez, 37-anyos, residente sang Barangay Caidquid, Mambusao kag Felicito Durana sang Barangay Sto. Rosario, Jamindan, Capiz.
Base sa imbestigasyon sang Mambusao PNP, padulong sa banwa sang Mambusao ang salakyan nga ginamaneho ni Serafin Llegue, 75-anyos ang edad kag residente sang Barangay Lapaz, banwa sang Jamindan. Natagpilukan ang driver sang salakyan sa kurbadahon nga bahin sang karsada kag gindalasa sini ang kasugata nga motorsiklo nga ginasakyan sang mga napatay nga biktima antes nagbunggo sa isa ka balay sa kilid sang dalan.
Bangud sa mabaskog nga impact sang pagkabunggo, nag-angkon sang mga patal nga kapilasan sa lawas ang mga biktima nga gintunaan sang ila kamatayon. Gindala pa sa Mambusao District Hospital ang mga biktima apang wala gid masugpunan ang ila kabuhi. Sa karon yara na sa kustodiya Mambusao PNP ang driver sang Toyota Revo kalakip na ang iya salakyan.
*(photo from Mambusao PNP)*
