Motorsiklo ngan usa nga van nagbungguay, 2 patay

Duha an patay matapos nga magbungguay an usa nga motorsiklo ngan usa nga van nga Grand tours ha Brgy. Macagtas ha Catarman Northern Samar dida han dominggo.

Ginkilala an mga namatay nga hira Ricky Cabigting ngan hi Rogelio Salazar nga pareho nga residente ha Brgy. Washington han Catarman.

Ginkilala naman an drayber han van nga hi Romeo Bodalla, 49 anyos.


Subay hiton imbistigasyon han Catarman PNP, ginbabaybay han duha nga biktima sakay han motorsiklo an kalsada tipakadto ha Brgy. Washington tikang ini hira ha Catarman proper ngan an Grand tours van naman in tipakadto ha Catarman proper tikang ha Brgy. Macagtas. Nag over take daw an mao nga van ha tricycle ngan nagdikit an pareho nga bihikulo rason han aksidente.

Waray man may nasakitan ha pasahero han Grand tours van pero an duduha nga sakay han motorsiklo dead on arrival ha hospital.

Arestado na an drayber ngan paslak na ha Catarman Municipal Police Station ngan maatubang ha kaso nga kriminal ngan reckless imprudence resulting to multiple homicide.

Facebook Comments