Sapian, Capiz – Patay ang 43-anyos nga foreman samtang pilason man ang upod nga backrider matapos nga ginlasak ang mga ini sang 10-wheeler truck sa Brgy Majanlud, Sapian, Capiz alas 6:45 sang gab-i.
Nakilala ang biktima kay Rommel Alayon, residente sang Brgy Bato-bato, Mambusao nga wala gid makasalbar sa kamatayon matapos ginlasak sang goma sang truck nga ginamaneho ni Alden Parohinog y Ofialda sang Damayan, Sapian, Capiz.
Pilason man ang backrider ni Alayon nga si Jose Bernaldes y Villareal, 49-anyos sang Brgy. Bula, Mambusao, Capiz matapos ini ang naapok sa ginasakyan nga motorsiklo.
Nagaguha sa inisyal nga imbestigasyon sang kapulisan, padulong kuntani sa banwa sang Ivisan ang mga biktima sang aksidente nga nabunggoan ang early warning signage sa kilid sang dalan kabangdanan nga nadulaan sang kontrol sa manibela si Alayon.
Naapok ang mga ini sa lugar nga gina-agyan sang truck nga ginamaneho ni Parohinog kag nalasakan si Rommel Alayon.
Yara na subong nakahunong sa karsel sang Sapian PNP ang nasambitan nga driver sang truck samtang si Jose Bernaldes ang ginabulong sa ospital kag posible nga ma-utdan sang tiil.
