Mambusao, Capiz – Isa ang patay samtang madamo ang pilason sa pagbungguanay sang motorsiklo kag traysikol sa Brgy. Manibad, Mambusao alas 11:05 kagab-i. Wala gid matabangan sang mga doktor ang driver sang motorsiklo nga ginkilala kay Leopoldo Galan, 38-anyos sang Janiuay, Iloilo samtang pilason man ang backrider sini nga nakilala kay James Ryan Luces sang Agcagay, Jamindan, Capiz.
Lunsay man nga ginpangdangat sa ospital ang sakay sang traysikol nga nabungguan sang mga ini nga ginalakipan sang walo ka mga biktima upod ang driver nga nakilala kay Reymond Alpareño y Llasus,24 anyos sang Brgy. Tumalalud, Mambusao, Capiz.
Upod sa mga napilasan amo sanday Coleen Lacorte, 27-anyos; Flordeluna Oregen y Suelo, 36-anyos; Luna Valencia, 59-anyos; Angelica Andrada y Valencia, 19-anyos, lakip na ang apat ka mga menor de edad,lunsay mga residente sang Brgy. Tumalalud, Mambusao.
Nahibaluan nga yara sa impluwensya sang makahulubog nga ilimnon ang driver nga si Galan. Posible nga wala sini matalupangdan ang traysikol rasun nga nakabunggo ini. Bangud sa kabaskugon sang pagkabunggo, nagtabog si Galan kag nag-angkon sang patal nga mga pilas sa lawas nga gintunaan sang iya kamatayon. Padayon naman nga ginabulong sa ospital si ang driver sang traysikol nga si Aparenio kag ang iya mga pasahero, upod sa backrider ni Galan.
*(photo from Mambusao PNP)*
