Sa interbyu sa DXDC RMN Davao kang Police Corporal Windrex Bolivar, imbestigador sa Montevista Municipal Police Station (MPS), giila niini ang biktima nga si Ronel Renz Alvarez, 27 anyos, residente sa barangay asa nahitabo ang insidente, diin angkas niini ang iyang uyab nga si Diana Frel Suaner 25 anyos, taga Nabunturan, Davao de Oro.
Samtang, ang motovlogger ug nakabangga mao si Aldwin Gono, 27 anyos, taga Barangay Tuburan, Mawab, sa susamang probinsya.
Sa imbestigasyon, subay sa nakasaksi sa insidente, kusog kaayo ang dagan sa motovlogger diin matud sa imbestigador posibleng muabot kini og kapin 100 kilometers per hour, rason nga kusog usab ang impact niini sa nabanggang motor.
“Nag-travel ni gikan sa Mawab kini si Aldwin Quilapio Gono, driver, kadtong vlogger. Kusog kaayo iyang dagan. Naa gyoy witness. Pag-abot niya didto sa tulay, sa may Linoan, Purok 1, ning-left turn tong number sa isa ka motor. Wala na gyud niya nalikayi. Naigo gyud niya,” saysay sa imbestigador.
Tungod sa insidente, nakaangkon og severe head trauma ang biktimang lalaki nga namatay sa ospital samtang nakaangkon og severe injuries ang angkas niini nga gidala usab sa ospital.
Pahimango sa awtoridad ilabi na sa mga naga-motor nga likayan ang kusog nga pagpadagan aron malikayan ang aksidente sa dalan.
“Ang akoa lang (pahimangno), dapat dili lang gyud magpakusog og dagan. Basta motorcycle, sa outermost lane gyud ta mag-agi para iwas sa mga disgrasya. Dapat defensive driving pud pirminti. Mao gyud na atoa,” sulti sa pulis.
RadyoMaN Kirby Manzon
