Davao City – Matag bulan sa Nobyembre, ginakomemorar nato ang Kalag-kalag kun adlaw sa mga minatay.
Dinhi, ginaduaw sa katawhan ang ilang mga minahal sa kinabuhi nga nitaliwan na sa laing kalibutan.
Apan duna usay uban gipili nga kalimtan na nila ang mapait nga panghitabo ug ilubong na lamang sa dayon ang tanan sama sa paglaum nga mudatu pa ug mahaw-as sa kapobrehon ning naglisod nato nga panahon diin sila usa sa nabiktima sa nahimong kontrobersyal nga investment scam.
Usa lamang si Jomar Uson, usa ka trabahante sa furniture shop, ug napulo na katuig nga residente sa Brgy. Communal Buhangin sa mga nabiktima sa gitawag nga ‘investment scams’ nga mikaylap dili lang sa Davao apan sa tibuok nasud Pilipinas.
Segun niini nga bisan bag-o pa kini nag-invest ug gamay lamang ang kwarta nga ilang natigom aron iinvest, dako na kadto nga kantidad sanglit ila kadtong gitiguman sa iyang siyam pa ka mga kakaubanan diin ang pinakasakit, wala gayud sila kasulay nga mag payout.
“Para mudaghan ang kwarta para motubo kay dako man ang porsyento sa tubo mao nag invest mi… Dili lang ako pati mga trabahante dinhi nag-ambag-ambag pero naabtan man pagkabulabog…”
Sakit paminawon apan kinahanglan ipadayon ni Jomar ang kinabuhi rason nga nahuna-hunaan nila ang magmugna og sementeryo sa mga scam sa kwarta ingon man sa gugma.
“Murag wala namay pag-asa, mao nang nabuhat namo ning cemetery nga bisan ginagmay lang amo na-invest ilubong nalang to namo,” matud niini.
Gani dakong leksyon nga nakuha ni Jomar…
“Dili na ta mag apil-apil anang mga ingon niana kay scam man gyud na.. manginabuhi nalang ta og tarong ug mangitag makapalipay kanato,” segun niini.
Sa kinabuhi, dili nato kinahanglan magpabilin sa mga problema ug kasakit nga atong nasinatian. Dungan sa pagtulun-an nga ang tawo angay nga dili magpondo sa kapakyasan apan mag-‘move on’ ug mo-‘move forward’, kita mulambo dili lang isip tawo ning kalibutan apan gigasahan sa Gino-o sa maayong misyon.
Kun unsa man ugaling ang mga kapildihan nga atong masinatian mientras buhi pa kita nining kalibutana, angay natong hinumdoman nga dili diha matapos ang tanan: Mientras buhi pa kita, dili gayud kita angay mawad-an sa paglaum sanglit malubong man tuod ang atong mga damgo diha sa kalimot, anaa Siya nga maoy mo-agakay kanato sa bag-ong kadaugan ug kalampusan sa unahan.
RadyoMaN Jason Amisola
