Davao City – Wala maghatag ang City Engineers Office (CEO) og tagal sa ilang mga contractors kung hangtud kanus-a mahuman ang proyekto sama sa road project nga ilang masungkit sa bidding.
Sumala ni CEO Chief Engineer Joseph Dominic Felizarta nga sa bidding process pa lang, ilatag na sa matag contractor ang timeline sa ilang proyekto subay sa mando sa balaod.
Segun ni Felizarta, ugaling mapakyas ang contractor sa pagtuman sa target sa timeline sa proyekto pabayron nila ang construction company.
Gipasigarbo ni Felizarta nga dinhi sa dakbayan walay pagdelatar sa mga proyekto tungod kay kun madugay man og tapos ang proyekto, ginapadad-an og sulat ang mga contractors o dili ba kaha pabayron.
Gibatbat pa sa opisyal nga ubos sa balaud, lowest bidder gayod ang mudaog sa bidding process ug makakuha sa nakaplastada nga mga proyekto pang-imprastraktura.
Naglikay una si Felizarta sa pagkomento sa suhestiyon nga wad-on ang lowest bidding scheme kay nagamit lamang kini sa kawatan nga mga opisyal nga nakigkonsabo sa pipila ka erring contractors.
Gisugilon pa sa opisyal nga dili gayud malikayan nga adunay sub-contracting nga buhaton ang mga contractor hilabi pa kun dili nila hasa ang usa ka partikular nga proyekto.
Nasayran nga walay na sub-contract nga mga proyekto dinhi sa siyudad sa Dabaw.
RadyoMaN Joel Viray
