TACLOBAN CITY – Ginpamumusil-patay an usa nga Municipal councilor ngan asawa hini han diri pa makilal-an nga suspek ha Brgy. Jose Rono, Paranas, Samar alas 7:00 han aga kasangkulop, September 15.
Ginkilala an konsehal nga hi Claudio Gabiana, 55 anyos, Municipal councilor han Jiabong, Samar.
Ginkilala naman an asawa hini nga hi Assuncion Gabiana, 56 anyos, former Brgy. Chairwoman han Brgy. Jose Roño.
Nagawas ha inisyal nga imbistigasyon han mga otoridad, ginsakob han armado nga suspek an mag-asawa ha ira panimalay ngan ginpamumusil an mga biktima.
Naka-angkon hin tulo (3) nga igo hin pusil hi Claudio ha iya lawas nga nagresulta han iya pagkamatay samtang hi Assuncion naigo dapit ha iya dughan.
Dayon naman nga kumalagiw an suspek.
Nadara pa hi Assuncion ha hospital pero dead on arrival na ini.
Basi ha testimonya han mga nagpakakita, 5’7″ tubtob 5’9″ an kahitaason han suspek, fair complexion, light build, may sul-ot nga kalo, itom an bado ngan long pants an sul-ot.
Narekober han mga otoridad ha crime scene an upat (4) nga basyo han bala han unidentified nga armas.
Ha pagka yana, nagpapadayon pa an imbistigasyon han mga otoridad.
