Davao City – Nagtoo ang Police Regional Office 11 (PRO-XI) nga lig-on ang testimonya sa mga testigo ug ang mga ebidensiya nga nahipos sa Talomo PNP aron magduot kang Rico Jay Labao sa kamatayon sa 6 anyos nga batang babaye nga si alyas Jane sa Matina Pangi ning siyudad subay sa gilusad nga makuting imbestigasyon.
Gani gibutyag ni PRO 11 spokesperson Police Chief Inspector Milgrace Driz nga ang mas nakakumbinser sa Talomo PNP nga si Labao maoy naghimo sa mangilngig nga krimen mao ang iyang mismong nagsumpaki nga pamahayag dihang gipailawom kini sa makuting pagpangutana sa tulo ka mga imbestigador.
Segun ni Driz nga mas mibarog pa ang pagduda sa kapulisan kang Labao human nakita kini sa iyang silingan nga gikan sa sapa diin nadiskubrehan ang biktima nga walay na’y kinabuhi ug nabasa ug napuno sab og sagbot ang sapot sa suspect niadtong adlaw nga nawala ang biktima.
Gumikan sa nakalap nga mga circumstantial evidence, ang Talomo PNP nagpasaka na og tukmang kasong murder kang Labao kinsa padayon pang nagtingkagol sa mao nga buhatan.
Tambag sa tigpamaba sa rehiyunal nga buhatan sa kapulisan ngadto sa mga ginikanan nga ampingan gayud ingon man bantayan og maayo sa tanang panahon sa mga ginikanan ang ilang mga kabataan aron wala na’y lain pang bata or batan-on nga mabiktima sa mangilngig nga matang sa krimen.
RadyoMaN Joel Viray
