Sa interbyu sa DXDC RMN Davao kang Jenifer Jaban, kabanay sa biktima, gisaysay niini nga padulong ang mga biktima sa Surigao aron mutambong og kasal apan aksidenteng nabangga ang gisakyang nilang Toyota SUV (Sports Utility Vehicle) sa naka-park nga sakyanan.
“Naa man goy flying stone nga nakuan sa iyahang salamin, natabon ba. Unya nakuratan sila. Wala siya nakabantay nga naa diay dump truck sa atubangan,” sulti sa kabanay.
Ang mga biktimang namatay mao sila Allen King Orbegoso, 48 anyos, driver sa sakyanan, Daisyjane Orbegoso, 33 anyos, Joel Tica, 34 anyos, Genalyn Jaban, 56 anyos, ug Ebon Tica, 4 anyos.
Samtang, kritikal ang sitwasyon ni JV Boy Orbegoso, 10 anyos nga anaa karon sa ospital sa Bunawan.
Posibleng mag-atubang og kaso ang tag-iya sa dump truck diin matud pa sayop ang pag-park sa sakyanan.
Sa pagkakaron, padayon nga giimbestigahan sa kapulisan ang nahisgutang aksidente.
RadyoMaN Kirby Manzon
