Pagadian City – Gikompirmar sa Pagadian City chief of Police Lt. Col. Alvin Saguban nga walay mahitabong muzzle taping kon ang seremonya sa pagbutang ug masking tape sa service firearms sa mga kapulisan.
Kahinumdumang kaniadtong milabayng mga tuig sa wala pa ang paglingkod ni kanhing Director Gen. Ronald “Bato” Dela Rosa isip hepe sa kapulisan, naandan na nga adunay pagbulit sa sumbuhan sa armas pinaagi sa pagbutang ug masking tape kon ang gitawag nga muzzle taping aron dili kini magamit pagpabuto.
Namahayag si Lt. Col. Saguban nga gawas nga walay kamanduan gikan sa PNP National headquarters, dili na matud pa angayan nga buhaton ang muzzle taping gumikan kay professional, responsable ug disiplano na ang mga pulis karon.
Kini na ang ikatulong tuig nga walay pagbutang ug masking tape sa mga armas sa kapulisan.
Gipaniguro sa hepe ning syudad nga mag-atubang ug kasong criminal ug administratibo ang si kinsang pulis nga maghimo ug indiscrimate firing niining kapaskuhan ug nagsingabot nga pagsugat sa bag-ong tuig.
