Ginpamumusil patay an aktibo nga myembro han Civilian Armed Forces Geographical Unit o kun CAFGU ha Sitio Sinulayan, Brgy. Sangay Palapag, Northern Samar kakulop.
Ginkilala an biktima nga hi Pedro Verano, 50 anyos, waray asawa ngan residente ha Brgy. Talolora ha nasabi nga bungto.
Subay hiton inisyal nga imbistigasyon han Palapag PNP, kumadto ha Brgy. Sangay hi Verano sakay hiton single nga motor kay ginbibisita niya an iya umangkon nga Brgy. Kapitan naman didto. Pagsakob niya ha nasabi nga barangay mayada mga nagmemeeting nga grupo nga mga armado nga waray niya kahisabti.
Han pag tipauli niya, ginhuhulat na ngayan hiya hini nga grupo ngan didto na hiya ginpamumusil.
Naangkon han biktima an tulo nga igo hiton calibre 45 nga pusil, usa ha iya ulo, usa ha iya dughan ngan usa ha iya tiyan.
Sumala kan SPO1. Marlo Capate, imbistigador han nasabi nga insidente, ginpusil an biktima ha atubangan mismo han iya iba pa nga mga umangkon nga mga menor de edad.
“Sa katunayan nga po binaril sya sa harap mismo ng kanyang mga pamangkin. Hindi na sya nakababa ng motorsiklo, doon na sya namatay. Buti nga yung mga bata hindi natamaan.”
May nakarawat dayon nga report an Palapag PNP nga may ginpusil ha nasabi nga barangay pero waray dayon hira makaresponde kay may mga armado pa nga grupo nga nakabantay ngadto.
“Baka pag pumunta kami doon yun pa ang maging dahilan na maubos yung tropa namin.”
Gintutuuhan han Palapag PNP nga mga NPA an nagpapaluyo hini nga krimen. An trabaho kasi han biktima intel ha CAFGU sanglit maaram na daw an mga suspek kun hain ini pirmi nagkikinadto.
Pag may gumawas nga mga witness plano han mga otoridad nga pasakahan hin kaso nga murder an mga suspek.
Makikipag koordinar na liwat hira ha mga kasundaluhan para mapoypoy ini nga mga NPA ha ira bungto.
