N-H-A, nagturnover kagahapon ug temporary shelters alang sa pamilya nga nawad-an ug pinuy-anan tungod sa giyera sa Marawi City

Pormal na’ng gihatag kagahapon sa National Housing Authority o NHA ang 206 ka units sa mga transitory shelters o temporary house sa Barangay Boganga, sa Marawi City, ngadto sa lokal nga kagamhanan.

Kini aron puy-an sa mga pamilyang nawad-an sa ilang mga pinuy-anan tungod sa lima ka bulan nga giyera niadtong 2017 tali sa puwersa sa gobyerno ug sa teroristang Maute-ISIS group.

Matud pa ni NHA Director Roderick Ibanez, unang batch pa lamang kini tungod kay sa bulan sa Marso sa kamtangang tuig, isunod ang pag turn-over sa 250 ngadto na sa 300 ka mga temporary shelters aron makumpleto ang 550 ka mga units sa unang quarter pa lang sa 2019.


Subling gipasabot sa NHA nga priyoridad nga mahatagan og temporary houses ang mga pamilyang namuyo sa evacuation centers sa nagkalain-laing dapit sa Lanao del Norte ug sa Lanao del Sur.

Ang temporary relocation site sa Boganga, nga tawgon og Lake View Shelter, maoy ikaduhang temporary relocation site nag gipabuhat sa gobyerno.

Na-una na niini ang 11 ka hektaryang yuta sa Barangay Sagonsongan nga gitawag og Bahay Ng Pagbabago nga adunay may 1,052 concrete temporary shelters nga natukod.

Facebook Comments