NA-ENGANYO LANG | Ex-seaman kag isa pa ka persona nga taga- Ivisan, dakop sa buy bust operation sa Burgos Ilaya Brgy II, Roxas City!

38

Roxas City, Capiz- Arestado ang duha ka mga persona sa ginkasa nga buy bust operation sang mga katapo sang Station Drug Enforcement Team sang Roxas City PNP.
Ginkilala ang mga subject person kanday Mark Anthony Alabot, 35-anyos sang Brgy. Cagay, Roxas City kag Jose Anthony Berdugo y de los Santos, 28-anyos sang banwa sang Ivisan kun sa diin narekober sa mga ini ang kabug-osan nga 16 ka sachet sang ginasuspetsahan shabu.
Maluwas diri, nakuha man sa posesyon sang mga ini ang P1 000 pesos nga buy bust money, duha ka cellphone, rolyo sang aluminum foil, duha ka disposable lighter, gunting, digital weighing scale kag itum nga box nga ginabutangan sang mga items.
Sa interview kay Mark Anthony Alabot, ginsiling niya nga 2016 siya nagpanaog sa barko. Aminado ini nga nagaduso siya sang ilegal nga druga matapos nga maenganyo nga magsulod sa nasambitan nga ilegal nga aktibidad samtang wala pa makasakay sa barko. Ini ang may yara sang duha ka mga bata.
Ginkumpirmar naman ni Kapitan Luzminda dela Cruz nga lunsay indi mga residente sang iya barangay ang nagkaladakpan nga mga suspek.
Ang nasambitan nga mga persona ang magapangatubang sang kaso nga paglapas sa RA 9165 ukon Comprehensive Dangerous Drugs Act of 2002.

Facebook Comments