BACOLOD CITY – Na wow-mali ukon nagsala sa ila ginpatigayon nga drug operation ang City Drug Enforcement Unit sang Bacolod City Police Office sa isa ka balay kagab-i sa Brgy. 2, Bacolod City.
Nagpadulong sa Police Station 2 ang complainant nga si Romeo Algusa, 55 anyos ang edad, kasado kag pumuluyo sang Purok Sigay, Brgy. 2 ciudad sang Bacolod agud ipa-blotter ang mga katapo sang CDEU sang BCPO nga nagsala sa pagpatigayon sang ila operasyon kon diin ang iya balay amo ang ginsudlan imbes kuntani nga balay sang ila subject.
Suno kay Algusa nga may mga las 6:30 kagab-i samtang nga ini siya ang nagapahuway-huway, hinali na lamang nga pwersa nga nagsulod ang mga katapo sang CDEU kag ginhalungkat ang iya balay.
Nakibot siya suno sa iya bangud wala man ini sang may nahimo nga sala kag sang gin-usisa, indi gali amo ang balay nga nasudlan sang mga operatiba.
