Tukuran, Zamboanga del Sur— Kasong murder ug carnapping ang ipasaka batok sa duha ka lalaki nga suspek sa pagpusil patay sa usa ka haba-habal driver alas 7;50 kagabii dihang dapita sa Purok Kuta, Brgy. Militar, Tukuran, Zamboanga del Sur.
Sa interview sa RMN Pagadian kang Pinsp. Roel Jaictin Japay , giila ang biktima nga si Virgilio Enderez 37 anyos, lumulupyo sa Brgy. Tiguma, Pagadian City.
Ang gitumbok nga nakapusil mao ang iyang mga pasahero nga sila si Jalal Damiano ug Jamil Baudi residente sa Brgy. Bunk House, Malabang, Lanao del Norte.
Nasapon sa PPSC Militar detachment ang duha ka mga suspek dihang misulay unta pag-ikyas gamit ang motorsiklo sa biktima, nakuha gikan sa posisyon ni Jalal Damiano ang ebidensya nga gigamit sa pagpatay sama sa Calibre 45 nga pistola nga loaded pa sa upat ka buhing bala.
Pagpangarnap ang motibo nga gituohang motibo sa maong pagpamusil.
Sa eksklusibong interview usab sa RMN sa suspek nga si Damiano, giangkon niini nga siya ang nipusil patay sa maong habal-habal driver.
Gibutyag usab sa igsoon sa biktima nga si Loloy Enderez, kung siya ang pabut-on dili na angay buhion ang mga suspek nga mihunos sa kinabuhi sa iyang igsoon.
“Kun ako ang pahukmon dili nana angay paugmaan sir’’ pamahayag ni loloy.
Tags; Mel Coronel, Kenneth Alvin Bustamante, RMN DXPR Pagadian 603
