Davao City- Kumpirmadong mga ecstasy ug uban pang klase-klaseng mga iligal nga droga ang nasakmit sa Philippine Drug Enforcement Agency (PDEA) XI uban ang National Bureau of Investigation XI ug Mabini Municipal Police Station atol sa gilusad nga buy-bust operation sa beach resort sa Barangay Pindasan, Mabini, Davao de Oro.
Sa interbyu sa RMN Davao kang Atty. Aileen Lovitos, PDEA XI Regional Director, nigula ang resulta sa laboratory result nga nagkumpirma sa maong mga klase sa droga nga narekober sa mga party goers.
Gibutyag ni Lovitos, nga sa inisyal nga resulta 14 sa 17 nga mga nadakpang personalidad ang nagpositibo sa ecstacy, shabu ug marijuana human kini gipailawom sa drug test.
Ipasang-at ngadto sa piskalya karong adlawa ang mga kaso batok sa mga suspek ilawom sa Sec. 5, 6, 7, 13 ug 14 sa RA 9165.
Niadtong Sabado, pasado alas-9:00 sa gabie gisulod sa mga awtoridad ang maong beach resort diin kapin kun kulang P1.5M nga assorted drugs lakip niini party drugs ang nasakmit.
Malampusong naaresto sa mga operatiba ang target sa drug buy-bust operation nga si Revsan Ethelbert Papay Elizalde, 33 anyos ug residente sa Catalunan Pequeño, Davao City lakip na 16 ka mga kaubanan niini nga sila Eana Faye Marie Olea, Bryk Jiordan Archival, Kurk Bryan Tiubot, Paolo Guerero, Jomark Aping, Ariel Bueno, Edel Caballero, Ronald Chuan, Fritz Dinopol, Tom Jhun Doblas, Mark Christopher Isip, Janlord Masong, Christopher Prudente, Jesus Ragas III, Giovanni Tabanao ,Jason Viduya.
Matud ni Lovitos, dugay-dugay nga panahon nila nga gi-surveillance ang subject sa operation.
Tungod usab sa kapuno sa PDEA XI Detention facility sa kadaghang nadakpang mga drug suspect, naka-detain karon ang 17 ka mga suspetsado sa NBI Davao.
RadyoMaN Aimee Guinita
