TACLOBAN CITY – Nagwithdraw han kandidatura pagka Congressman han 2nd district han Leyte hi Atty. Nico Villasin, dida han byernes han kulop, usa ka semana antis an local elections campaign ha Marso 29.
Sumala kan Villasin, napagdesisyonan niya nga diri nala umapi ha mulay hiton politika tungod nga ginkasuhan an iya bugto nga hi Tacloban City Councilor Raisa Villasin.
“Tungod man gud nga an akon bugto in ginsasamok hin pipira katawo nga diri ako maaram kun ano it ira panuyo. As a lawyer, kinahanglan ko depensahan tubtob kun ano it akon makakaya kay iba na ini nga istorya nga akon bugto na it gin-iinaway.”
Hi City Councilor Villasin in naatubang ha reklamo nga perjury nga ginpasaka ni Nestor Abrematea, Benjamin Tan Villegas, ngan Florante Ygana.
Hi City Councilor Villasin in nadalagan ka-board member ha 2nd district han Leyte pati na gihapon an mga nagpasaka hin kaso kontra ha iya.
Sanglit hi Atty. Nico Villasin iton matindog nga abugado ha iya bugto.
Usa daw gihapon ini nga higayon para matagan niya hin oras an iya pamilya.
Pero kun waray daw pasakahi hin kaso an iya bugto, mapadayon hi Atty. Villasin pagdalagan ka-Congressman.
Pagklaro ni Atty. Villasin, waray hiya bayari o gin-abisuhan nga umatras pagdalagan, iya daw ini kalugaringon nga desisyon.
Hi Atty. Villasin in usa nga board member nga magtatapos na an termino yana nga Hunyo.
