Report ni: Tita Jen Palomo Debaja
Patay ang isa ka OFW kahapon Miyerkules, Setyembre 26, 2018 sa Saudi Arabia matapos nag amok kag nag pang buno sang 7 tanan ka kaupdanan sa gina obrahan sa Jazan, KSA. Duwa sa mga biktima ang patay man, isa ka Pakistani kag ang ila 56 anyos nga manager.
Samtang ginpa idalum man sa medical treatment ang 5 pa sa mga napilasan sa pagpang buno.
Pareho nga empleyado ang Pinoy kag ang Pakistani sa Farsan Island unit sang Saudi Electricity Company (SEC) sa southern Jazan province.
Sa pahayag ni Consul Ed Badajos, may nagluntad nga baisay sa tunga sang duwa nahanungod sa pagka terminate sang Pinoy asta nag amok ini kag ginlagas sang kutsilyo ang Pakistani nga ginkilala kay Arbab Ahmed. Dala ang kutsilyo kag fire extinguisher, nalab-ot sang pinoy ang Pakistani kag ginbuno ini.
Nagpangayo pa sa bulig ang Pakistani sa opisina sang ila manager nga si Naseebi, 56, isa ka Saudi national.
Gintinguhaan sang manager nga pakalmahon ang nag amok nga pinoy apang ginhandos man siya kag naigu gid sa dughan kag puwak.
Suno pa sa balita nga nagcirculate sa Saudi, napilitan tiruhon sang security forces ang Pinoy matapos niya gin buksan ang fire extinguisher. Tungod sa patal nga igo sang armas luthang patay gid ang OFW.
Sa twitter account sang SEC, nagpalab-ot ini sang simpatiya kag condolences sa pamilya sang mga nagtaliwan nila nga mga empleyado.
Wala pa gin hingadlan ang pinoy samtang padayon pa ang pag pangusisa sang mga ATN opisyal sang embahada sa Saudi ang nasambit nga insidente.
