Davao City – Gikasuhan na ang lalaki nga nag bomb joke sulod sa Davao International Airport nga miresulta sa pagkalangay og halos duha ka oras sa usa ka flight biyahe padulong sa Cebu kagahapon sa buntag.
Sa interbyu sa DXDC RMN Davao kang Patrolman Krisffer Ian Lucena sa Sasa PNP, naila ang suspek nga si Ramon Barrios, 40-anyos, taga Purok 9, Poblacion, Monkayo, Compostela Valley nga sakay sa usa ka flight padulong sa Cebu nga naka schedule nga mulupad alas-7:50 sa buntag.
Sa report, samtang nag assist sa mga pasahero ang usa ka flight crew, nakadungog kini og istoryahanay sa mga pasahero kung unsa ang sulod sa dala niining gamit ug saysay sumala pa ni Barrios nga bomba. Gipangutana kini sa crew ug ingon niini nga nagkumedya lang siya.
Diri na gitawag ang atensyon sa lead cabin crew ug sa duty security officer sa Final Security Screening Area ug gi-aresto si Barrios.
“Na alarma man gud kay daghan og tao ato nga time unya sa airport pa gyud,” saysay ni Lucena.
Kasong paglapas sa Presidential Decree No. 1727 or the anti-bomb joke law ang atubangon sa lalaki ug mamahimong makulong og hangtud lima ka tuig o multa hangtud P40,000 o bin ba kaha atubangon ang susamang sanctions subay sa desisyon sa korte.
RadyoMaN Kirby Manzon
