Dipolog City – Patay ang usa ka 61 anyos nga lalaki human giluba-luba sa iyang kainom nga silingan nahitabo bandang alas 4:00 ang takna sa miaging hapon sa may Purok Gumamela, Barangay Sinaman ning dakbayan sa Dipolog.
Giila ang biktimang namatay nga si Jose Carreon Bosmion Jr., samtang ang nidungab nga suspek mao si Rolando Cañeso, 28 anyos, ulitawo, usa ka vendor ug magsilingan ang duruha sa dapit diin nahitabo ang krimen.
Nasayran sa rmn news team ang suspek ug biktima uban sa ilang mga silingan nag-inom sa may videokehan diin adunay nagsaulog ug birthday party.
Sa lintunganay sa ilang inom ug nangalasbag sa bino, sumala pa ang suspek nidungang hagbong ug sensilyo aron mokanta apan gipitkan matud pa ang kamot niini sa biktima kay maoy mounag kanta nga gikapongot sab niini.
Didto na nagkaengkuwentrohay kon diin nisangpot ang suspek nakakitag kutsilyo ug giluba-luba ang biktima.
Dali pa untang gidala sa mga silingan ang biktima sa Zamboanga de Norte Medical Center aron katambalan apan gideklara kining dead on arrival sa attending Physician nga si Dr. Serafin Uy M.D human nakahiagom ug samad linubaan ang nakadaiyang bahin sa lawas.
Ang suspek nga nisibat human sa krimen, kagahapon sa buntag boluntaryo kining nisurrender sa kagawad sa ilang Barangay ug gilayong gitugyan sa Dipolog PNP diin gibalhug na karon sa prisohan.
