Nag-prank nga vloggers sa Mawab kasohan

Davao City – Nanghinaut ang kapulisan nga magsilbing leksyon usab sa uban pang vloggers ang nahitabo sa duha ka batan-on sa Mawab, Davao de Oro nga kasohan human mihimo og prank nga makonsiderang alarm and scandal ilawom sa Article 155 sa Revised Penal Code, sa ilang pagyaga-yaga sa usa ka gasoline station sa National Highway, Barangay Poblacion, Mawab niadtong Miyerkules, Enero 18, 2023.

Sa interbyu sa DXDC RMN Davao kang Police Major Delia Gesultura, Acting Chief of Police (COP) sa Mawab Municipal Police Station (MPS), gibutyag niini nga regular filing ang giproseso sa kapulisan batok kang Jonel Cordero sa ‘Cordero Brothers’, 29 anyos taga Barangay Andili, Mawab ug Arnold Rabi, taga Barangay New Visayas sa maong munisipalidad.

Gitataw ni Gesultura nga mag-atubang gayud og kaso ang nagahimo og “fake emergency” prank o mga binuhatan nga muhatod og panic o disturbo sa publiko.

“To all vloggers, with all due respect po, let us be responsible lang po sa atong actions especially sa content sa atong vlog, lalo na ‘yung mga prank-prank na ‘yan kasi marami tayong nadadamay or naaabala,” sulti sa police official.

Kahinumduman nga nipalit og P10 nga gasolina si Jonel ug gibutang sulod sa empty bottle sa softdrinks ug didto giingon niini nga iyang giinom ang gasolina ug nagpaka-aron ingnong nalipong nagsuka-suka.

Gilayong nanawag ang taga gas station sa Municipal Disaster Risk Reduction and Management Office (MDRRMO) Mawab ug pagresponde, didto na nila giingong prank lamang tungod kay adunay lahi nga bote nga sulod energy drink nga maoy giinom niini.

RadyoMaN Kirby Manzon