GENERAL SANTOS CITY – Nitugpa sa balay tambalanan ang motorcycle rider nga nibangga sa sampot sa traysikel sa national highway sakop sa San Roque Barangay Labangal ning siyudad sa GenSan human nga nag-ala superman sa kahubog sakay og motorsiklo alas-4 sayo sa buntag.
Giila ang nahisgutan sa pangalang Alejandro dela Pena 24 anyos residente sa Purok Sta. Cruz Barangay Calumpang nagmaneho sa Yamaha Sniper 150cc nga nibangga sa likod nga bahin sa traysikel gidrayban ni Jamar Padayag 32 anyos residente sa Malok Labangal ning siyudad.
Nasayran sa traffic investigation sa TMU parehong naglawig sa national highway ang mga nalambigit sa disgrasya kung asa paliko ang traysikel apan kusog ang padagan sa Yamaha Sniper niresulta sa grabeng impak sa bangga.
Matod sa habal-habal drayber nga si Mike River nakit-an niya ang paghapa-hapa sa drayber sa single motorcycle nga ni-overtake kaniya apan pag-abot sa unahan nadunggan niini ang lagapak sa mga sakyanan.
Natuwad ang traysikel ni Padayag samtang nabungkag ang atubangan nga bahin sa motorsiklo ni dela Pena.
Gisi sa ulo bali ang walang bahin sa tiil og pangos sa kalawasan ang naangkon ni dela Pena samtang samad sa lawas ang naangkon ni Padayag.
