Roxas City, Capiz- Kaluoy sa kaangay nga mga OFW ang rason sang pagbulig ni alyas “Roger” sa mga ginmaltratar nga OFW sa pungsod Kuwait.
Sa eksklusibo nga interview sang DYVR, ginsaysay sini kon paano niya nabuligan kag narescue sa kamot sang mapintas nga amo ang parehas man nga Capizeña OFW sa Kuwait nga si Yolanda Villasis.
Suno pa diri nga nakita gid lamang niya sa social media ang paghenyo sang tabang ni Villasis. Ini pa ang nagapang-alang alang sang una nga magpabulig bangud sa kahadlok nga madakpan sang iya employer.
Apang nagpasalig naman si alyas “Roger” nga siya ang bahala sa bayad sa taxi gani natigayon ang ila kontrata nga pagkitaay ala una sang kaaganhon kon sa diin sa maayo nga palad nakalab-ot naman sa Philippine Embassy si Villasis kag ang kaupod man sini sa balay nga isa man ka OFW kag taga-syudad sang Davao.
Sa subong mas hilway na ang kahimtanagan ni Villasis sa Philippine Embassy samtang ginaproseso pa ang iya mga dokumento antes nga makapuli balik sa PIlipinas.
Sa madumdoman, naghenyo sang bulig pinaagi sa Facebook ang biktima kaupod man sa mga kapareho sini nga OFW bangud sa alegasyon nga ini ang ginapagutuman sang iya employer.
Maluwas diri, siya pa ang ginasakit kag ginapahog nga pagapatyon.
Suno kay alyas “Roger” indi mahapos ang ila kahimtangan nga mga OFW sa luwas sang pungsod bangud nga kabuhi nila ang nakataya kag pasuwerte kon bala maayo nga amo ang ila matup-an.
Nahibaluan nga si Villasis ang panglima na nga OFW nga nabuligan ni alyas “Roger” nga tumandok sang Brgy. Dayao, Roxas City.
